БИШКЕК. Кыргызстандын парламентин таратуу демилгесинин көтөрүлүшү өлкөдөгү туруктуулукка доо кетирип, кайрадан башаламандыкты пайда кылышы мүмкүн. Азыркы бийлик башкы көңүлдү өлкөнүн экономикалык абалын жакшыртуу маселелерине бурууга тийиш. Мындай пикирин 16-июлда Кыргызстан демократиялык партиясынын төрагасы Жыпар Жекшеев «Азаттыкка» билдирди. Парламентти таратууга ошондой эле «Менин өлкөм» партиясы да каршы. Аталган партиянын өкүлдөрүнүн пикиринде, азыркы парламентти таратпай туруп, Конституцияга өзгөртүүлөрдү киргизүү боюнча долбоордо каралгандай, кийинки жылдын башында Жогорку Кеңешке пропорционалдык системанын негизинде дагы кошумча 30 депутат шайланууга тийиш.
