Көз карандысыз комиссия Бириккен Улуттар уюмунда “Мунайдын оордуна тамак-аш” атуу Иракка байланыштуу гуманитардык программанын мурдагы жетекчиси Бенон Севанды “150 миң доллар пара алган” деп айыптады. Комиссия, ошондой эле, Улуттар уюмунун мурдагы кызматкери Александр Яковлевке да 950 миң доллар пара алган деген айып такты. Булар туралуу кечээ жарыкка чыккан докладда айтылган. Анын авторлору Улуттар уюмунун баш-катчысы Кофи Аннанга атайын кайрылуу жасап, бул адамдарды дипломатиялык кол тийбестик укугунан ажыратууга чакырышты. Ошондо гана аларга каршы кылмыш иши ачылышы мүмкүн.
