БИШКЕК. АКШнын Мамлекеттик катчысынын Кыргызстанга жасаган иш-сапарынын максаты боюнча саясатчылар жана атуулдук коомдүн өкүлдөрү ар кандай пикирлерин айтышууда. «Демократия жана атуулдук коом үчүн» бейөкмөт уюмунун төрагасы Эдил Байсаловдун пикиринде, Кондолиза Райстын бул иш-сапары Кыргызстанда март айында болгон ыңкылапты, ага байланыштуу өлкөдө орун алып жаткан өзгөрүүлөрдү колдоону билдирет. Бейөкмөт уюмдардын айрым өкүлдөрү белгилешкендей, Райстын Кыргызстанга болгон сапарынын максаттарынын бири - өлкөдөгү Конституциялык реформаны ачык жүргүзүүгө көмөктөшүү. Ал эми саясатчылардын бир бөлүгү болсо, мамлекеттик катчынын сапарын АКШнын Кыргызстанга болгон геосаясий кызыкчылыктарынын күчөшү менен байланыштырышууда.