Линктер

ЧУКУЛ КАБАР!
13-Июнь, 2024-жыл, бейшемби, Бишкек убактысы 10:01

БАРЫМТАГА АЛЫНГАН ЭКСПРЕССИОНИСТТЕР


Баян Жумакадыр кызы, Прага Швейцариянын Базель шаарындагы бажы пункту менен Женеванын аэропортунда барымтага алынган орус музейлеринин сүрөттөрү 16-ноябрда кайра бошотулду. Мындай чечим Швейцариянын өкмөтүнүн чечими менен кабыл алынды. Өкмөттүн айтымында, эл аралык мыйзамдар өнөр чыгармаларын менчик фирмалардын же кайсы бир кишилердин кызыкчылыгында барымтага алууга болбойт, деп айтылган. Москванын Пушкин атындагы музейинин 50дөн ашык сүрөттөрүнө “Нога” деген компаниянын доо арызы боюнча Швейцариянын соту тарабынан камаланган. “Нога” Орусиянын өкмөтүн 90-жылдардын башында Орусияга жиберген азык-түлүктүн акысын төлөбөй койгон, деп айыптоодо. Компания ан үчүн Орусиянын үстүнөн сотко арыз берип, бир жарым миллиард доллар өлчөмүндө кенемте акча кестирип алган. Бирок ал акчаны ушул күнгө чейин тийгизе албай келатат. Камаланган сүрөттөрдүн арасында Пьер Огюст Ренуардын, Эдгар Деганын, Винсент Ван Гогдун, Клод Моненин чыгармалары жана башка сүрөт шедеврлери бар болчу.

Орусиялык булактардын айтымында, бул орус музейлеринин ээлигиндеги картиналардын бир нече күндүн ичинде экинчи жолу камаланып олтурушу. ДПА кабар агенттигинин Орусиянын Швейцариядагы өкүлүчүлүгүнө шилтеме берип маалымдашынча, сүрөттөр ишемби күнү Валис сотунун андан бир күн мурда чыгарган чечими менен барымтага алынган. Бирок шейшемби күнү Орусиянын адвокаттары сүрөттөргө салынган арестти алдырып ташташкан.

Сүрөттөр Франция менен Германияда болуучу көргөзмөгө жөнөтүү үчүн Мартини шаарында машинелерге жүктөлүп, жолго чыкканда ишембиден шаршембиге караган түнү кайрадан токтотулуп олтурат. Булардын экинчи жолу камалынышына Нога компаниясынын кайрадан сотко кайрылып, тийешелүү чечим чыгартып алгандыгы себеп болгон.

Бул жөнүндө Орусиянын Швецариядагы элчилигинин пресс аташеси Игорь Петров буларды баяндаган:

- Швейцариянын өкмөтүнүн федералдык кеңешинин кийлигишүүсү менен кечээ жергиликтүү саат күндүзгү 3тө сүрөттөр бошотулган. Нога компаниясынын арызы боюнча, сүрөттөрдү экинчи жолу камалоо жөнүндө чечим чыгарылды. Компаниянын кызыкчылыгын көздөгөн чечим ого эле тез чыгарылды. Ошон үчүн машинелер азыр чек арада турушат.

Орусиядан аласасын өндүрө албаган “Нога” компаниясы сотко биринчи жолу 1990-жылдардын башында эле кайрылып, Стокгольм сотунун чечими менен Орусиядан бир жарым миллиард доллар өлчөмүндөгү кенемте акча кестиртип алган. Бирок акчаны тийгизип алуу оңой эмес болуп чыкты. Компания акыры биз сөз кылып жаткан чараларга барууга мажбур болгон.

1997-жылы “Нога” компаниясы Орусиянын Франциядагы элчилигинин банк эсептерин токтотуп, Франциянын Ле Бурже шаарындагы авиасалонго койулган Су үлгүсүндөгү аскердик учактарды жана "Седов" деген желкемени барымтага алууга аракеттенген. Натыйжада Орусия ле Буржедеги көргөзмөдөн дээрлик баш тартууга мажбур болгон. Мындан эки жыл мурда Франциянын соту “Нога” компаниясынын доо арыздары боюнча Орусиянын мүлкүнө арест салынбай турганын билдирген.

Расмий билдирүүлөр боюнча, Орусиянын “Нога” комапниясына болгон карызынын көлөмү 680 миллион долларды түзөт.

Орусия өкмөтүнүн аракеттеринин арты менен 16-ноябрда кечинде Швейцариянын бийликтери эл аралык мыйзамдар искусство чыгармаларын жеке кызыкчылыкта барымтага алууга жол бербесин билдирип, сүрөтөргө салынган камалоону алып салышты.

XS
SM
MD
LG