БИШКЕК. 7-январда Кыргызстандагы православдар Ыйсанын туулган күнүн белгилешти. Бул күнү Кыргызстандагы бардык чиркөөлөрдө майрамдык жөрөлгөлөр өткөрүлдү. Бишкектеги православдык чиркөөгө 500дөй адам келип, шам жагып кудайга жалынды. Чиркөөдөгү диний кызматкер Алексей Сыромятников "Азаттыкка" билдиргенге караганда, бул күнү кудайга жалынып, кедей-кембагалдарга садага таратып, муктаждарга колдон келген жардам берүү керек. Ыйсанын туулган күнүнө карата президент Курманбек Бакиев ортодокс христиандарга куттуктоо айтты. Анда Кыргызстандын жаңы мамлекеттүүлүгүнүн бекемделишине христиандардын салымы чоң деп айтылган. Кыргызстанда православдардын 43 чиркөөсү бар.
