Жогорку Кеңештин депутаттары президент менен диалогду жакташат. Бул тууралуу көпчүлүк депутаттар дүйшөмбү күндөгү жарым сааттык пикир алмашуу учурунда билдиришти. Депутат Кубатбек Байболов президентти парламентке чакырып, бардык маселелер боюнча «ийри отуруп, түз кеңешүүгө» чакырды. Депутат Өмүрбек Бабанов болсо президент менен парламент ортосунда түшүнбөстүк бар экенин белгилеп, аны мамлекет башчысынын катышуусу менен чечүүнү жактады. Депутат Рашид Тагаев Жогорку Кеңештеги тирешүүчүлүктү токтотууну талап кылды. Президент жума күндөгү билдирүүсүндө парламентти кескин сынга алган эле.
