БИШКЕК. 28-июнда таңга маал Карабалта шаарындагы барак тибиндеги он жети батирлүү үйдөн өрт чыгып, натыйжада элүүдөн ашык киши үй-жайсыз калышты. Өрт кызматынын маалыматына караганда, турак үй толугу менен күйүп кетти, бирок, адамдардын өмүрүнө зыян келген жок. Учурда окуяны иликтөө боюнча атайын комиссия түзүлүп, ишке киришти. Адистер өрттүн чыгышына электр энергиясын туура эмес пайдалануу себеп болушу мүмкүн деп болжоп жатышат. Карабалта шаар бийлиги жабыркагандарды убактылуу жайларга жайгаштырып, тамак-аш менен камсыздап жатат.
