ҮРКҮН КУРМАНДЫКТАРЫНЫН СӨӨГҮ 90 ЖЫЛДАН КИЙИН ЖЕРГЕ БЕРИЛЕТ

27-Июль, 2006

Тарыхта Үркүн деген ат менен калган 1916-жылдагы кандуу кыргындан шейит болгон кыргыздардын сөөгү 90 жылдан бери көмүлбөй, ач бел, куу жондо, кокту-колоттордо, какшыган сай жээктеринде кала берген. Үркүндө жарык дүйнөгө келген наристелер быйыл 90 жашта. Демек бул каргашалуу окуянын тирүү күбөлөрүн табуу азыркы күндөрү оңой эмес. Мурдагы доордо коммунисттик бийлик, анын аскер чегарачылары көмүүсүз калган сөөктөрдүн жанына бир дагы кыргыз аттууну жолотпой келген. Бишкектин Ала Тоо аянты бүгүн мына ошол ата-бабаларыбыздын сөөгүн жерге жашырып, кыргыздын каада-салтын жасап, куран окутуп, ашын берип келүү үчүн Бедел жана Ак шыйрак ашууларына жөнөп бараткандарды узатты.

Демилгелүү топтун курамына “Асаба” кайра жаралуу партиясы, "Ашар" үй куруучулардын уюму,”Эрайым” аялдар коомдук бирикмеси, ж.б. бир катар коомдук уюмдар, журналисттер, бардык жети дубан өкүлдөрү жана өзгөчө кырдаалдар министрлигинин жигиттери, врачтар, баш-аягы 120 киши кирет. Аянтта кыска митинг болуп, жөнөп бараткандарга кайрылып Кыргызстандын вице-премьеринин милдетин аткаруучу Тынычбек Табалдиев сөз сүйлөдү. Бийлик өкүлдөрүнөн мындан бөлөк ырасмий бир да адам катышкан жок. Сөөк коюуга жөнөп бараткандар бүгүн Боом капчыгайындагы жана Балыкчы шаарынын кире биришинде курулуп жаткан эстеликтерге куран окуп, Барскоон айлынын башына келип өргүшөт. Бул жерден аларга Нарындан жана Ысыккөлдөн чыккан топтор кошулат. Бул иш-чара бир жумага созулат.

Шайлообек ДҮЙШЕЕВ