БИШКЕК. “Аксы” коомунун 9 млн. сомдон ашык бажы төлөмдөрүнө байланышкан кылмышка эч кандай тиешеси жок. Бул тууралуу аталган коомдон “Азаттыкка” билдиришти. Буга чейин бир катар маалымат каражаттары “Аксы” коому “Борборазиялык Моторз Сэйлз корпорациясы” тарабынан берилген гуманитардык жардамды таратууда 9 млн. сом өлчөмүндөгү салыктан качып, кылмышка барган деп жазып чыгышкан. Коомдун мүчөлөрү белгилешкендей, алар тарабынан гуманитардык жардам сатылып же таратылган эмес. Аны таратуу ишин өз мойнуна “КСК-Алтын” жоопкерчилиги чектелген коом алган.