БИШКЕК. Качкындар, терроризмге каршы күрөш жаатындагы Кыргызстандын азыркы саясаты Варшавада Канада, АКШ, Голландия өңдүү өлкөлөрдүн, эл аралык укук коргоо уюмдарынын кескин сынына кабылды. Бул тууралуу ЕККУнун Демократиялык институттар жана адам укугун коргоо бюросунун жылдык жыйынына катышып келген «Кылым шамы» бейөкмөт уюмунун башчысы Азиза Абдурасулова билдирди. Бүгүн аталган жыйындын кийинки бөлүгүнө катышуу үчүн Варшавага «Демократия жана жарандык коом үчүн» коалициясынын башчысы Эдил Байсалов жөнөп кетти. 4-13-ноябрь аралыгында өтө турган бул салттуу жыйынга Кыргызстандан ондон ашык укук коргоочулар, расмий өкүлдөр катышып жатышат.
