Кыргызстандын акыйкатчысы Турсунбек Акундун маалыматына караганда, такыр баштардын колунан мерт болду деп саналган кыргызстандык 4 жаранга байланышкан кылмыш иши Орусияда тергелип бүтүп, сотко өткөрүлдү. Бул тууралуу акыйкатчы менен Кыргызстандын Орусиядагы элчиси Аттокур Райымкуловдун жолугушуусунда сөз болду. Акыйкатчы мындай аракеттердин көрүлүшүнө Орусиянын акыйкатчысы Владимир Лукиндин аракеттери олуттуу таасир берди деп эсептейт. Кыргызстандын акыйкатчысы жарандардын өлүмүн иликтөөгө кол кабыш кылууну сунуштаган кат менен Орусиянын акыйкатчысына мурда кайрылган. Орусияда жыл башынан бери кыргызстандык 11 жаран такыр баштардын колунан мерт болгондугу кабарланып келатат. (BuS)
