Кошмо Штаттардын мамлекеттик катчысы Кондолиза Райс Вашингтон шериктерин коргоо милдеттенмелеринен тайбайт жана Иран андан күмөн санабай эле койсун деп билдирди. Райс ушу тапта Грузияда сапарда жүрөт. Шаршембиде болсо Иран Израилге чейин жетүүгө кудуреттүү ракеталарын сынаган. Райстын сөзүнөн көп узабай Ирандын мамлекеттик телеканалы Перси булуңунда дагы бир нече ракета сынактан өткөрүлгөнүн кабарлады. Мамкатчы ошондой эле Россияны Тбилиси менен сепаратисттик жумурияттары ортосундагы кризиске салым кошпостон, аны жөндөөгө жардамдашууга үндөдү.
