Акыйкатчы Турсунбек Акун “Азаттыктын” суроосуна жооп берип жатып, өлкөдө жарандардын ар тараптуу маалымат ала билүү укуктары чектелип жаткандыгын, ушундай өңүттөгү арыздар институтка соңку күндөрү көп түшүп жатканын билдирди. Анын айтымында, жер-жерлерден кайрылгандар кийинки күндөрү обого чыкпай калган “Азаттык” жана “Би-Би-Си” үналгысынын тагдырына кызыгышууда. “Көз карандысыз, эркин маалымат каражаттарынын обого чыгарылбай жатышын туура эмес деп эсептейм. Анткени эркин маалымат каражаттары өлкөбүздүн демократиялык нукта өнүгүшүнө чоң салым кошушкан жана кошуп келатышат. Андыктан бул багытта кемчиликтерди кетирбөөбүз зарыл”,- дейт Акыйкатчы Турсунбек Акун. (IJz)
