Замандын залкар жазуучусу Чыңгыз Айтматовду эскерип, бүгүн эртең менен президент Курманбек Бакиев баш болгон мамлекет жетекчилери, замандаштары “Ата Бейиттеги” анын көрүстөнүнө барып гүл чамбар коюшат. Андан соң Улуттук китепканада “Ала-Тоодон ааламга жол салган Айтматов” аттуу даректүү фото-китеп көргөзмөсү ачылат. Гапар Айтиев атындагы сүрөт музейинде “Тоолор кулаганда” аттуу көргөзмө уюштурулат. Ала-Тоо кинотеатрында “Ак кеме” кинотасмасы көрсөтүлүп, режиссердук топ жана актерлор менен жолугушуу болот. Кечке маал Токтогул Сатылганов атындагы Улуттук филармонияда Чыңгыз Айтматовдун чыгармаларынын 8 томдугунун бет ачары кыргыз искусствосунун чеберлеринин концерти менен коштолот. Бул тууралуу Маданият жана маалымат министринин орун басары Орозбек Айдаров “Азаттыкка” билдирди. (AJ)
