Дүйшөмбүгө караган түнү Израилдин аба күчтөрү Газадагы Ислам университетин жана өкмөттүк комплексти аткылашты. Палестина жетекчилигинин айтымында Израилдин чабуулдарынан Газада 298 адам набыт болуп, 900гө жакыны жаракат алган. Бириккен Улуттар уюмунун Коопсуздук кеңеши жана Евробиримдик Газага чабуулдарды тезинен токтотууга чакырды. Газа тилкесиндеги кырдаалга тынчсыздануусун билдирген Улуттар уюму Израилди да, Палестинаны да зордук-зомбулукту токтотууга үндөдү.
