Бул тууралуу СДП фракциясынын жетекчиси Бакыт Бешимов “Азаттыкка” билдирди. “Менимче база калат. Анткени америкалыктар менен орусия сүйлөшүп туруп ушундай бир чечимге келет окшойт. Бул болсо кыргыз-америка сүйлөшүүлөрү парламенттин күн тартибинен чыгарылып, орусия-америка сүйлөшүүлөрү күн тартибине киргизилгендигине байланыштуу. Кыргызстан бул маселе боюнча эл аралык айдыңда өзүнүн эркин жана эгемендүү жүрүш-турушун жоготуп жаткансыйт”,-деди Башимов. Ал ошондой эле кыргыз бийлиги Орусия убада кылган акча каражатын качан берерин күтүп жатканын, эгерде орус өкмөтү 30-мартка чейин кредитке деген 300 млн. долларды бербесе соодалашууга өтөрүн кошумчалады. Бешимов Манас аба майданындагы АКШнын аскерий аба базасы менен президент Курмабек Бакиевдин экинчи мөөнөткө барам дегени бири-бири менен байланышкан маселелер экендигин баса белгиледи. Анын айтымында, март айында депутаттар шайлоочулар менен жолугушканы бир айга каникулга кетишкенден кийин, Манас аба базасына байланыштуу маселе парламентте каралбай калат. (AJ)
