БЭКтин штаб башчысы Азимбек Бекназаровдун билдиришинче, 7-мартта кечке маал "Асаба" жана "Ак шумкар" партияларынын Токтогул районундагы чогулушунда БЭКтин өкүлчүлүгү түзүлүп, анын башчысы шайланды. Ош-Бишкек жолунун боюнда өткөн жыйынды Токтогул райондук кеңешинин төрөгасы жана өкмөттүк башка кызматкерлер алыстан байкап көз салып турушту, бирок жакын келишкен жок. БЭКтин өкүлдөрүн Токтогул шаарчасынан Бишкек шаарына дейре он машина менен белгисиз адамдар коштоп келишти. "Президентти да мынча адамдар коштоп жүргөнүн мен көрө элекмин",- деп айтты Азимбек Бекназаров.
