Бул тууралуу “Ак шумкар” партиясынын төрагасы Темир Сариев “Азаттыкка” билдирди. Саясатчынын айтымында кезектеги президенттик шайлоонун 23-июлга белгиленип жатышы, жайында эл жокто административдик ресурсту колдонуп туруп, шайлоо өткөрөбүз дегени. “Мунун аягы чоң чыр менен бүтүшү мүмкүн. Муну бүгүн ошо Жогорку Кеңеште отурган депутаттар дагы, бийлик да түшүнүшү керек”, - дейт Т. Сариев. Жогорку Кеңеш жума күнү Конституциялык Соттун чечиминин негизинде президенттик шайлоону 23-июлга белгиледи. Конституциялык Сот келерки президенттик шайлоо 25-октябрга чейин өтүшү керек деген тыянакка бейшемби күнү келген. (ES)
