БУУнун качкындар агенттигинин маалыматына ылайык, бир нече күндүн ичинде Пакистандын түндүк-батыш аймагынан жарым миллинго жакын адам жер которууга аргасыз болду же көчүүгө даярданууда. Качкындар боюнча Жогорку комиссариат Сват өрөөнүндө талип согушкерлерине каршы жүрүп жаткан аскерий операция 1 миллиондой адамдын жер которушуна алып келиши ыктымал деп эскертет. Бүгүн Сватта өкмөттүк учактар талиптердин турумдарын бомбалашты. Армиянын өкүлү Насир Хандын маалыматына ылайык, бүгүнкү операциянын натыйжасында 12 согушкер жок кылынды.
