Райондук сот Ноокат окуясы боюнча 32 кишини соттоп, 9 жылдан 20 жылга чейин жаза чектеген. Облустук сот аны күчүндө калтырган. Бүгүн Жогорку Соттун коллегиясы Ноокат окуясы боюнча соттолгондордун 22синин арызын караганы жатат. Бул тууралуу Акыйкатчы институтунун карамагындагы укук коргоочулар кеңешинин мүчөсү Бурул Макенбаева билдирди. Кыргызстандын акыйкатчысы Турсунбек Акун ушул аптада Жогорку Сотту укук коргоочулардын иликтөөлөрүнүн тыянагын эске алууга чакырды. Акыйкатчынын алдындагы укук коргоочулар кеңеши Ноокат окуясын өз алдынча иликтеп, жарандарды соттоодо одоно мыйзам бузууларга жол берилди деген тыянак чыгарган.(BuS)
