Европа биримдигинин бюджет боюнча коммиссары Даля Грибаускайте өнөктүктүн биринчи эле айлампасында жеңди. Бюллетендердин дээрлик бардыгы саналып бүткөн маалда чыккан жыйынтыктарга караганда, ага шайлоочулардын 69 проценти ишеним көргөздү. Шайлоо коммиссиясынын маалыматына ылайык, добушканаларга шайлоочулардын 51 проценти келди. Грибаускайте президенттик кызматты 2 мөөнөт ээлеген Валдас Адамкусту алмаштырмакчы. Көз карандысыз талапкер катары ат салышкан 53 жаштагы экономист тажрыйбасын Литваны экономикалык кризистен чыгарууга жумшаарын шайлоо кампаниясы учурунда убада кылып келди.
