Демилге топтун башчысы, айылдык Кеңештин депутаты Манас Эргешов «Азаттыкка» билдиришинче, Жапалак кыштагында 27 миң калк жашайт, анын 13 миңдейи шайлоочулар. Шаарга караганы менен элеттин эли көбүнчө айыл чарбасы менен жан багат. Ошондуктан аймакка кайрадан айыл өкмөтү статусун ыйгарбаса, бул жерди байырлагандардын көйгөйүн калаа бийлиги бат эле унутуп, убагында чечкидей эмес. Жогорку Кеңештин депутаты, социал-демократтар фракциясынын мүчөсү Асылбек Шарипов жапалактыктардын талабын туура көрөт жана маселенин оң чечилишине алардын партиялаштары көмөктөшөөрүн маалымдады. (ATo)
