Иранда Британ элчилигинин жергиликтүү кызматкери Хосейин Рассам үч апта абакта отургандан кийин эркиндикке чыкты. Адвокат Абдолсамад Хорамшахинин айтымында, ал үчүн 100 миң доллар күрөө төлөндү. Рассам 27-июнда элчиликтин башка дагы сегиз кызматкери менен бирге камакка алынган. Аларга президенттик шайлоодон кийин орун алган тополоңдорго тийешеси бар деген айып коюлган. Британ элчилиги Иран бийлигинин мындай айыптоосун четке кагып келет.
