Ноокен районунун Масы айыл өкмөтүндө 3 мал сарай өрттөндү

24-июнга караган түнү Жалал-Абад облусунун Ноокен районуна караштуу Масы айыл өкмөтүндө белгисиз адамдар мал сарайга өрт коюшкан. Ноокен райондук өрт өчүрүү бөлүмүнүн башчысы Абдишариф Оморовдун билдиришинче, короо ичинде салынган 3 сарай өрттөнгөн. Ал эми жабыркаган жергиликтүү тургундардын айтымында, 6 мал сарай өрттөнгөн. Алар өздөрү экөөнү өрт өчүрүүчүлөр келгиче өчүрүп үлгүрүшкөн.

Учурда бул факт боюнча облустук ички иштер башкармалыгы иликтөө иштерин жүргүзүүдө. Бул туурасында “Азаттыктын” аймактагы кабарчысы билдирди. (AzK)