Бүгүн парламент кезектеги жыйынга чогулуп, жыйын башында депутаттар ар түркүн маселелер боюнча чыгып сүйлөштү. Айрым депутаттар көрүнүктүү мамлекеттик ишмер Исхак Раззаковдун атын Бишкек шаарындагы Биринчи май районуна ыйгаруу демилгесин көтөрдү. “Ар-намыс” партиясынын депутаты Акылбек Жапаров дагы бир мамлекеттик ишмер, 90 жаштагы Турдакун Усубалиевдин да атын бир районго берүү сунушун айтты. Кечээ Абдылас Малдыбаев атындагы опера жана балет театрында президенттин катышуусунда Исхак Раззаковдун 100 жылдыгына байланыштуу салтанаттуу маареке өткөн. Аты аталган бул эки инсан учурунда өлкөнү башкарып турган. (EBM)
