Леди Гаганын (Lady Gaga) Индонезиянын борбору Жакартада 3-июлга пландалган концерти болбойт. Америкалык ырчынын стили өтө эле адепсиз, анын денеге жабышкан кийими жана эротикалуу бийи жаштарды бузат деген негизде бул концертке үч исламчыл уюм каршы чыккан эле. Атүгүл айрым исламчылар Леди Гаганын концертин күч менен токтотобуз деп опурулуп жатышкан. Мындан улам полиция концертке 40 миң билет сатылып кетсе дагы аны болтурбоо жөнүндө чечим кабыл алганын билдирди.
