Бул тууралуу бүгүн премьер-министр Арсений Яценюк билдирди. Анын айтымында, Киев малайзиялык учактын 17-июлдагы кыйроосу боюнча тергөөнү “батыштык өнөктөштөр” координациялоосуна мүмкүндүк берет.
Яценюк кошумчалагандай, учурда кырсык болгон жерден 298 жүргүнчүнүн 272синин сөөгү алынды. Украина сөөктөрдү Амстердамга соттук-медициналык экспертизага жөнөтүүгө даяр. Учак кыйраганда курман болгон 298 кишинин 192си Нидерланддын жарандары.
Украин өкмөт башчысы белгилегендей, Киев учакка ракета, балким, БУК-М1 системасынан атылган ракета тийди деген ишенимде турат жана украин аскерлерине каршы Москва курал берип машыктырган жикчилер күрөшүүдө.
Украин өкмөт башчысынын алдында орус президенти Путин бүгүнкү билдирүүсүндө “эгер 28-июнда Украинанын чыгышында уруштар кайра жанданбаганда бул трагедия болмок эмес” деп ырастаган.
Путиндин пикиринде, трагедияны “чайкоочулук максатта” колдонууга эч кимдин укугу жок. (UE)
