Калифорниянын губернатору Жэрри Браун штаттын бир бөлүгүндө чукул кырдаал жарыялады. Жекшембинин таңында ал жерде 6 баллдык жер титирөө катталган. Зилзаланын очогу Сан-Францисконун түндүгүндө, Напа шаарына 10 чакырым жакын жерде орун алган. Акыркы кабарларда эки чоң киши жана бир бала оор жаракат алганы, бардыгы болуп 87 киши ооруканага кайрылганы айтылат. Миңдеген киши электр жарыгысыз калды. Көптөгөн имараттар, жолдор, суу жана газ түтүктөрү зыян тартты.
