Донецктин мэриясы орусиячыл жикчилер менен өкмөт ортосундагы ок атышпоо келишими бир нече жолу бузулганын билдирди. Шаар орусиячыл козголоңчулардын таянычы болуп эсептелет. Мэриянын ырастоосунда, кечээ кечинде көп кабаттуу турак-жайга ракета атылган. РИА Новости агенттиги козголоңчуларга шилтеп жазганына караганда, андан эки киши набыт кетти. Бирок шаар бийлиги андай маалыматтын жоктугун айтып, бүгүн эртең менен да аткылоо болгонун кошумчалады.
5-сентябрда козголоңчулар менен куралдуу күчтөр ок атышпоого макулдашып, ошондон бери аны карманып келишти. Өткөн аптада тараптар артиллерия менен оор техникасын буфердик тилкеден алып чыгуу тууралуу сүйлөшкөн жана 24-сентябрдан тарта келишимди аткара башташканын ырасташууда.