2-6-октябрь күндөрү Ош шаарында “Сулайман-Тоо – тынчтык жана ынтымактын символу” аталышындагы маданий иш-чаралар коштолгон фестивал өтөт. Бул тууралуу Ош шаардык мэриясынын басма сөз кызматынан кабарлашты. Иш-чаранын максаты Ош шаарынын жана Сулайман-Тоонун символикалык маанисин түшүндүрүү менен анда жашап жаткан улуттарды ынтымак, биримдикке чакыруу.
Анда тарыхчы Антонина Захарованын «Сулайман-Тоо. Мифтер, легендалар, жомоктор, изилдөөлөр» аттуу монографиясы коомчулукка сунушталат.
Фестивалдын жүрүшүндө театрлаштырылган көрсөтүүлөр, сүрөт көргөзмөлөрү, классикалык музыка концерти, элдик кол өнөрчүлүк жармаңкеси жана спорттук мелдештер уюштурулат.
Белгилей кетсек, Ош шаарынын борборунда жайгашкан Сулайман-Тоо 2009-жылы ЮНЕСКОнун Испанияда өткөн 33-отурумунда «Ыйык тоо» наамы менен Бүткүл дүйнөлүк мурастар тизмесине киргизилген. (TSh)
