Астана шаарынын Сары-Арка райондук соту Евгений Вдовенкону Украинадагы согушка өз эрки менен барган деп тапты.
30 жаштагы Вдовенко октябрда кармалып, соту 12-декабрда башталган эле. Тергөөчүлөрдүн айтымында, ал орусиячыл жикчилдер көзөмөлдөгөн Луганск облусунун борборунда черүүдө жүргөн жана чек ара бекеттерин күзөткөн.
Вдовенко Украинага адам өлтүргөнү же өкмөттү төңкөрүүгө барбаганын айтып, жарым-жартылай күнөөсүн моюнуна алды. Ал 2009-2012-жылдары каракчылык кылган жана мыйзамсыз курал кармаган деп айыпталып, абакта отуруп чыккан.
Чыгыш Украинада жикчилдер менен апрелден бери жүрүп жаткан согушта 4700дөн көп адам жайран болду.
