Бул тууралуу “Азаттыкка” Ош облустук ИИБнин маалымат катчысы Жеңиш Аширбаев билдирди. Анын айтымында, мындай билдирүү кылмыштардын бетин ачуу боюнча жыл жыйынтыгын чыгарган ИИМдин көчмө жыйынында айтылган.
- Жыйында издөөдөгү Канжар Кадыралиевдин кармалбай жатканы, Ош аэропортунда болгон каракчылыктын, ошондой эле облустук жана шаардык башкармалыктардын кароосундагы алты оор кылмыштын бети ачылбай жатканы сынга алынды, - деди Аширбаев.
Жыйында аталган кылмыштарды иликтеп жаткан кызматтардын жетекчилерине ээлеген кызмат орундарындагы өз милдеттерин толук эмес аткарды деген баа берилип, алардын бетин ачууга бир ай мөөнөт берилди.
Ош облусунда 2014-жылы 140 оор кылмыш катталып, 137 кылмыштын бети ачылган. Облуста өткөн жылы жалпысынан 2215 кылмыш катталса, 238инин бети ачылбай турат.(YI)
