Бириккен Араб Эмираттары ишембиде Йеменде саясий абалга байланыштуу өз элчилигин жапканын маалымдады. 13-февралда Сауд Арабиясы, Италия жана Германия Санадагы дипөкүлчүлүктөрүн коопсуздукка байланыштуу жапкан. Ага чейин АКШ, Британия жана Франция ушундай чечим кабыл алышкан болчу.
Январь айында Йемендин президенти Абд-Раббу Мансур шиит өкүлдөрү хуситтер менен бир нече айга созулган кармаштан кийин отставкага кеткен. Андан кийин бийликке келгендер парламентти таркатып, Абд-Раббу Мансурду жана анын өкмөт мүчөлөрүн үй камагына алган.
Өткөн жылдын сентябрь айында хуситтер Йемендин борборунун көпчүлүк бөлүгүнө көзөмөл орнотуп, андан кийин өлкөнүн башка аймактарын ээлей баштаган.
