Актер Жеки Чандын 32 жаштагы уулу Жейси Чан алты айлык камак мөөнөтүн өтөп чыккан соң кылган күнөөсү үчүн коомчулукка жүгүнүп кечирим сурады. Ал 2014-жылдын августунда тайвандык актер Ко Кай менен бирге маңзат пайдаланганы үчүн камалган болчу. Полиция Чандын Пекиндеги үйүнөн 100 грамм марихуана тапкан. Ага өткөн жылдын декабрында “маңзат жайылтуу” боюнча айып тагылган.
Ишемби күнү Жейси Пекинде уюштурулган маалымат жыйынында жасаган жоругуна өкүнүп жатканын айтты. Мындан ары убактысын үй-бүлөсүнө бөлүп, пайдалуу иштер менен алектенүүгө убада берди. Анын маалымат жыйыны Кытайдын мамлекеттик телеканалында түз көрсөтүлдү.
