Бишкекте 6 жаштан 18 жашка чейинкилер арасында шахмат боюнча Кыргызстандын чемпиондугу өтүп жатат. Өлкөнүн шахмат федерациясынын президенти Милан Турпановдун "Азаттыкка" билдиришинче, оюндар 7 категорияда уюштурулган. 23-мартта башталган мелдешке өлкөнүн бүт аймактарынан 400дөн ашуун шахматчылар катышууда. Жабылыш аземи бүгүн, 30-мартта саат 16:00до Балдар жана өспүрүмдөрдүн республикалык "Сейтек" борборунда болот. Жеңүүчүлөр Азия жана дүйнө чемпиондуктарына катыша турган улуттук курамага мүчө болушат. (ECh)
