Өзбекстандын атын атагысы келбеген жараны Сох анклавынан чыга бериштеги Кадамжай өткөрүү пунктундагы шартка нааразы болуп “Азаттык” радиосуна даттанды. Ал чек арадагы кезек күтүү жарандарга түйшүк жаратып жатканын билдирди:
- Чек арадан өтүш үчүн үч жарым саат убакыт коротуп жатабыз. Ферганага барып кайра келатканда дагы ошончо убакыт кетет. Бүгүн, 8-апрелде жаанга карабай, өткөрүү пунктунун эки жагында 50дөн ашуун киши топтолуп турат. Биз Өзбекстандын башка аймактарына катташыбыз керек. Кезек күтүп отургандар арасында ооруп, бейтапканага бараткандар да бар,- дейт коңшу өлкөнүн атуулу.
Мамлекеттик чек ара кызматы бул маалымат текшерилип, жооп берилерин маалымдады.
Өзбекстандын Сох анклавы Кыргызстандын Баткен облусунун ичинде жайгашкан.
Кыргыз-өзбек чек арасынан өтүүнү эки мамлекет жарандары тең көйгөй катары айтып келишет. Кыргызстандыктар коңшү өлкө чек арачыларынын оройлугуна, ашыкча текшерүүлөргө нааразы болушат. (SE)
