Ат-Башы районундагы Казыбек жана Ача-Кайыңды айылынын тургундары акысыз медициналык кароодон өтүштү. Өнөктүк Бириккен Араб Эмираттарынын Life кайрымдуулук уюмунун жана “Шаржа” кайрымдуулук бирикмесинин каржылык көмөгү менен ишке ашып, райондук үй-бүлөлүк дарыгерлер тобунун кызматкерлери эки күн элдин саламаттыгын текшеришти.
Аталган уюмдун Кыргызстандагы өкүлү Жылдыз Ишеналиева билдиргендей, жарандардын 80% жүрөк-кан тамыр оорусу менен жабыркары аныкталды. Медициналык кароонун жыйынтыгы жакында өкмөткө жөнөтүлөт.
Life уюму 2014-жылдын июнь айынан тартып Кыргызстандын айыл жерлеринде акысыз медициналык кароо уюштуруп келет. (MiK)
