КОНКАКАФтын Алтын кубогунда ишеничтүү оюн көрсөтүп жаткан АКШ чейрек финалда Кубаны 6:0 эсебинде утуп, жарым финалга жолдомо алды. Оюндун жүрүшүндө жарым коргоочу Клинт Демпси мыкты оюн көрсөтүп, үч голду жаратууга үлгүрдү. Ошондой эле Ямайка 1:0 эсебинде Гаитини утуп, жарым финалга жолдомо алган экинчи команда болду. Бүгүн Тринидад жана Тобаго чейрек финалдык оюнду улантып Панама менен ойнойт. Ал эми Мексика Коста-Рика менен күч сынашмакчы.
КОНКАКАФтын Алтын кубогу быйыл АКШда өтүп жатат. Кубокту жеңген мамлекет 2017-жылы Конфедерация кубогуна катышууга жолдомо алмакчы. (SDz)
