Баткен облусунун Тажикстан менен чектешкен Көк-Таш, Таш-Тумшук, Мазейиттин жери жана Көк-Терек айылынын айрым тургундары, балдар жана аялдар коңшулаш айылдарга чыгарылууда. Мындай кабарды “Азаттыкка” Көк-Таш айылынын тургуну Мансур Алиев билдирди.
Анын айтуусунда, айылдан чыгып кетип жаткандардын саны азырынча белгисиз. Ар ким өз унааларына түшүп, коңшу айылдардагы тааныш-туугандарыныкына кетип жатышат.
Учурда Баткендин Көк-Таш айылындагы кыргыз-тажик чегинде абал курч. Ок атылып, эки тараптан тең жабыркагандар бар экени кабарланууда.
Баткен районунун Көк-Таш айылы менен Тажикстандын Чорку айылы чектешкен аймакта 3-августта кыргыз жана тажик жарандары жаңжалдашкан.
Ага биртоп күн мурун Тажикстан Көк-Таш айылынын көрүстөнүнө барчу жолду жаап салганына нааразы болуп кыргыз жарандары тажик айылына кеткен сууну бууп салышы себеп болгон. (JsA/МТо)