Ирак парламенти мурдагы премьер-министр Нури Малики башындагы ондогон мартабалуу чиновниктерди жоопко тартуу жөнүндө сунушту колдоду.
Парламенттин юридикалык комитети өткөргөн иликтөө аларды 2014-жылы Мосул шаарын “Ислам мамлекети” экстремисттик тобунун басып алуусу үчүн жооптуу деп тапкан эле. Бул иликтөө 17-августта чара көрүү үчүн Ирактын башкы прокуроруна да жөнөтүлдү.
Добуш берүү ачык болуп, чечимди көпчүлүк депутаттар да колдогонун вице-спикер Мухамед Карбули билдирди. Буга чейин Мосулду алдырууга Ирактын аскерий жана саясый жетекчилиги жооптуу экени айтылып, бирок конкреттүү ысымдар аталган эмес болчу.