Бириккен Улуттар уюму Украина чыгышындагы кагылыштарда курман болгондордун саны кеминде 7 миң 962 адамга жетип, дагы 17 миң 811 киши жараланганын билдирди.
"Бул болжолдуу гана эсеп, чыныгы курмандыктардын саны мындан алда канча көп болушу мүмкүн", - деп айтылат БУУнун Адам укуктары боюнча башкармалыгынын бүгүнкү билдирүүсүндө.
Украинанын Донецк менен Луганск облустарында өкмөттүк күчтөр менен орусиячыл жикчилдер ортосундагы кагылыш 2014-жылдын апрелинде башталган. Ок атышууну токтотуу боюнча быйыл февралда жетишилген келишим утур-утур бузулуп жатканы айтылып келет.
