Кыргызстандык мушкер Урмат Рыскелдиев менен Ямайкалык Натаниэл Галимордун Бүткүл дүйнөлүк бокс бирлигинин (WBU) чемпиондук куру үчүн таймашы тең чыгуу менен аяктады. Кыргыз мушкеринин менеджери Жаныш Осмондун айтуусунда, беттеш 24-октябрда АКШнын Лос-Анжелес шаарында өттү.
69 кг. салмакка чейинки мушкерлердин күч сынашуусу 8 раундга созулган. Калыстардын бири жеңишти Урматка, бири Натаниэлге ыйгарса, бир калыс тең чыгууну белгилеген.
27 жаштагы Ямайкалык Натаниэл Галимор буга чейин профессионалдык рингде 9 беттеш өткөрүп, бардык беттештерде жеңүүчү болуп, анын ичинен 8ин нокаут менен уткан.
Урмат Рыскелдиев 2013-жылдан бери АКШда профессионалдык рингде чыгып жүрөт. Ямайкалык мушкер менен таймашка чейин 7 беттешке чыгып, 6 жолу утуп бир жолу тең чыккан. (ECh)
