Орусия чукул кырдаалдар министрлигинин учагы дүйшөмбү күнү эртең менен Каирден Петербургга авиакырсыктан мерт болгон 144 адамдын сөөгүн жеткирди. Калган сөөктөр дагы жакын арада алып келинет. Егиетте өткөн ишемби, 31-октябрда Орусиянын "Когалым Авиа" компаниясына таандык Аэробус A321-200 учагы кырсыкка кабылып, анын ичиндеги 224 адамдын бирөө да тирүү калган эмес. Алардын төртөө Украинанын, бирөө Беларустун, калганынын баары Орусиянын жарандары болчу.
Учак Египеттин Шарм-эш-Шейх курорттук шаарынан Петербургга учуп келаткан. Кырсыктын себептери азырынча белгисиз. Орусиялык жана египеттик адистер учакты кыйроого алып келген жагдайларды иликтөөдө.
