Бул тууралуу Өзгөчө кырдаалдар министрлигинин басма сөз катчысы Абдишарип Бекилов “Азаттыкка” билдирди. Анын айтымында, алдын ала маалыматтар боюнча жер титирөөнүн күчү 5-6 баллга жеткен жана силкинүүдөн кыйроолор болгону же адам өмүрүнө зыян келгени катталган жок.
Бекилов билдиргендей, Улуттук илимдер академиясынын Сейсмология институту силкинүү очогунда 5-6 баллга жеткен деген маалымат берүүдө.
Зилзала Ош облусунун Кара-Суу районундагы Ийрек айылынан 10 чакырым батыш тарапта, Ош шаарынан 30 чакырым түштүк-чыгыш тарапта болгон. Жер титирөө Каратай жана Ийрек айылдарында 5-6 балл, Ош шаарында 4,5 балл сезилген (маалымат дагы такталып жатат).
Бекилов Өзгөчө кырдаалдар министрлигинин тиешелүү башкармалыктары менен бөлүмдөрүнүн адистери жер-жерлерде тактоо иштерин жүргүзүп жатышканын кошумчалады. Тактоо иштери Ош, Жалал-Абад жана Баткен облустарында жүрүүдө.
17-ноябрда кечки саат он бир жарымдар чамасында жер титиреп, ал Кыргызстандын бир катар аймактарында сезилди.
Бельгиянын дүйнөдөгү зилзалаларды каттоочу earthquakereport.com вебсайты да 17-ноябрда Кыргызстанда түнкү саат 11:29да Рихтер таякчасы боюнча 5,8 баллдык жер титирөө болгонун каттаган.
Ал эми АКШнын Улуттук сейсмология институту кабарлашынча, зилзаланын эпицентри Ош облусунун Алай районунун борбору Гүлчөдөн 27 чакырым түндүк-батыштагы Кең-Жылга жана Ийри-Суу деген жерлердин ортосунда болгон.
