Бул тууралуу Нарын облустук оорукананын башкы дарыгери Мурат Атбаев “Азаттыкка” тастыктады. Анын айтуусунда, 22 жаштагы келиндин денесинин 65-70% күйүп 5-февралда оорукананын реанимация бөлүмүнө түшкөн. Андан бери толук эсине келе албай жатып 8-февралда кечке маал каза болду.
5-февраль күнү кечке жуук Нарындын 27 жаштагы тургуну келинчеги иштеген кеңсеге келип, эшикти ичинен бекитип алып, өзүнө жана аялына бензин чачып өрттөп жиберген. Учурда маркумдун жолдошу реанимацияда жатат. Анын денесинин 35-40 пайызы күйгөн. Абалы орто туруктуу. Такталбаган маалыматтар боюнча, окуяга үй-бүлөлүк чатак себеп болгон. (MiK)
