Азербайжандын Коргоо министрлиги Тоолуу Карабактагы салгылашта дагы бир аскери каза тапканын маалымдап, 2-апрелде тутанган коогадан бери 16 аскерин жоготконун билдирди. Армян жикчилдери 18 өкүлү курман болгонун кабарлаган. Мерт кеткендер арасында жайкын тургундар да бар экени айтылууда. Тараптар жаңжалдын тутанышына бири-бирин күнөөлөп жатат.
Бүгүн Азербайжан жана Армения ортосунда жайгашкан Тоолуу Карабак аймагындагы кырдаалга байланыштуу Европа коопсуздук жана кызматташтык уюмунун Минск тобу сүйлөшүүгө чогулду. Жыйын Венада өтүп жатат. Аталган топтун курамында АКШ, Орусия жана Франция өкүлдөрү бар.
