Сузак районундагы Алмалуу-Булак айылында жер көчкү алдында калган он беш жаштагы Урмат уулу Эрландын сөөгү бүгүн жерге берилди. 27-апрелде аталган айылдын Башы аймагында алты үйдү көчкү басып калган эле. Өспүрүм да топурак алдында калып, сөөгү кечээ табылган.
Ошол күнү Алмалуу-Булак айылынын Үч-Чат жайлоосунда көчкү бир үйдү басып калган эле. Кечээ да бул аймакта көлөмү 2,5 млн метр куб келген жер көчкү түшүп, кооптуу кырдаал жаралган. Өзгөчө кырдаалдар министрлиги билдиргендей, Алмалуу-Булак айылында көчкү коркунучу жогору бойдон калууда. Мындан улам Матиев атындагы орто мектептин 150 окуучусу жана 73 үй-бүлө коопсуз жайга көчүрүлдү. (NT/RsK)
