Сириянын Идлиб провинциясында абадан урулган соккудан он киши набыт болгонун Британияда жайгашкан Сириядагы адам укуктарын байкоо уюму кабарлады. Сокку 10-майда Идлиб шаарынан 6 чакырым алыстагы Биниш шаарына өкмөттүн же Орусиянын аскерий учагы тарабынан урулган. Набыт болгондор арасында козголоңчулардын командири да бар экенин укук коргоо уюму кошумчалады.
Түркияга жакын Идлиб провинциясын "Аль-Каидага" байланышы бар "Ан-Нусра фронту" жана "Ахрар аль-Шам" жихаддык топтору көзөмөлдөйт.
Ал арада ок атууну токтотуу жарыяланган Алеппо калаасында да майда кагылышуулар жүрүп жатканы кабарланууда.
Шейшемби күнү Орусия "Жейш аль-Ислам" жана "Ахрар аль-Шам" топторун террордук уюмдардын тизмесине киргизүүнү Бириккен улуттар уюмуна сунуштады. Бирок "Ахрар аль-Шам" жарашуу жараянына кошулгандыктан, БУУнун Коопсуздук кеңешинин бир катар мүчөлөрү бул сунушту кабыл алышкан жок.
