Өзбекстанда бүгүн үч күндүк аза күтүүнүн акыркы күнү. 2-сентябрда дүйнө салган президент Ислам Каримовдун өлүмүнө байланыштуу өлкөдө 3-сентябрдан тарта аза күтүү деп жарыяланган.
79 жашында инсульттан каза болгон маркумдун сөөгү өткөн ишемби күнү өзү туулуп-өскөн Самарканд шаарына коюлду.
Каримовдун жаназасына 17 өлкөнүн өкүлү катышты. Акыркы сапарга узатуу зыйнатында үй-бүлөсүнөн жесири Татьяна Каримова жана кичүү кызы, 38 жаштагы Лола Каримова-Тилляева болду. Лондондо жашаган уулу Петр жана үй камагында жүргөн кызы Гүлнара катышкан жок.
Айрым маалыматтарга караганда Каримов биринчи аялы, уулу Петрдин апасы Наталья Кучми менен 1969-жылы ажырашкан. (RK)
