Бул тууралуу президент Алмазбек Атамбаев “Газпром” компаниясы курган спорттук комплексти ачуу учурунда билдирди. Ал Баш мыйзамды өзгөртүүгө каршы чыккандар өлкө келечегин ойлобогондор катары атады:
- Кечээ Бакиев менен отурган. Бүгүн Төрөбаев менен бирге отурат. Конституцияга, өлкөгө каршы кыйкырышууда. Аларга өз чөнтөгүн толтуруш үчүн мандаттан башка эч нерсенин кереги жок, - деди Атамбаев.
Кыргызстанда Баш мыйзамды өзгөртүү аракети талаш-тартыштарды жаратты.
Баш мыйзамды өзгөртүү демилгесин парламенттеги беш фракция демилгелеп алып чыгышкан. Бирок долбоордун акыркы редакциясына кол коюудан “Бир бол” жана “Өнүгүү-Прогресс” фракцияларынын башчылары баш тартышкан. Алар муну баштапкы сунушталган текст өзгөргөнү менен түшүндүрүшкөн.
Ал эми оппозициялык «Референдумга-жок» кыймылы 8-октябрда Бишкекте форум өткөрүп, бийликти Баш мыйзамды өзгөртүү демилгесинен баш тартууга чакырган.
Бийлик референдумду 11-декабрда өткөрүүнү мерчемдеп жатат.(BkA/SDz)
